‘லப்பர் பந்து’, ‘மாமன்’ ஆகிய படங்களின் மூலம் ரசிகர்களிடம் பிரபலமான நடிகை சுவாசிகா கதையின் நாயகியாக முதன்மையான வேடத்தில் நடித்திருக்கும் ‘போகி’ எனும் திரைப்படத்தின் முன்னோட்டம் வெளியான குறுகிய கால அவகாசத்திற்குள் ஒரு மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனை படைத்து வருகிறது.
இயக்குநர் விஜய சேகரன் இயக்கத்தில் உருவாகியுள்ள ‘போகி ‘திரைப்படத்தில் சுவாசிகா, நபி நந்தி ,சரத், பூனம் கவுர் எழுத்தாளரும் நடிகருமான வேல
ராமமூர்த்தி, பாடலாசிரியர் சினேகன், சங்கிலி முருகன், மொட்டை ராஜேந்திரன், எம். எஸ். பாஸ்கர் உள்ளிட்ட பலர் நடித்துள்ளனர். ராஜா சி. சேகர் ஒளிப்பதிவு செய்திருக்கும் இந்த திரைப்படத்திற்கு மரியா மனோகர் இசையமைத்திருக்கிறார்.
உண்மை சம்பவத்தை தழுவி தயாராகி இருக்கும் இந்த திரைப்படத்தை வி சினிமா குளோபல் நெட்வொர்க் & லைக் நிறுவனம் தயாரித்திருக்கிறது. இந்த திரைப்படத்தை பி ஜி பி என்டர்பிரைசஸ் சார்பில் தயாரிப்பாளர் பி ஜி பிச்சை மணி வழங்குகிறார்.
எதிர்வரும் ஓகஸ்ட் மாதம் முதல் திகதியன்று உலகம் முழுவதும் பட மாளிகையில் வெளியாகும் இந்த திரைப்படத்தின் முன்னோட்டம் அண்மையில் வெளியிடப்பட்டது.
படத்தைப் பற்றி இயக்குநர் பேசுகையில், ” இந்தியாவையே உலுக்கிய இரண்டு உண்மை சம்பவங்களை மையமாகக் கொண்டு பரபரப்பான கிரைம் திரில்லர் பாணியில் இப்படத்தின் திரைக்கதை உருவாக்கப்பட்டிருக்கிறது. இது ரசிகர்களுக்கு சமூகத்தைப் பற்றிய விழிப்புணர்வை ஏற்படுத்தும்” என்றார்.
