மக்கள் செல்வன் விஜய் சேதுபதி நடிப்பில் தயாராகும் ‘தலைவன் தலைவி’ எனும் திரைப்படம் எதிர்வரும் ஜூலை மாதம் 25ஆம் திகதியன்று உலகம் முழுவதும் பட மாளிகையில் வெளியாகும் என பிரத்யேக காணொளி மூலம் படக்குழுவினர் அறிவித்துள்ளனர்.
இயக்குநர் பாண்டிராஜ் இயக்கத்தில் உருவாகி வரும் ‘தலைவன் தலைவி’ எனும் திரைப்படத்தில் ‘மக்கள் செல்வன்’ விஜய் சேதுபதி, நித்யா மேனன், யோகி பாபு உள்ளிட்ட பலர் முக்கிய வேடங்களில் நடிக்கிறார்கள். எம். சுகுமார் ஒளிப்பதிவு செய்திருக்கும் இந்த திரைப்படத்திற்கு சந்தோஷ் நாராயணன் இசையமைத்திருக்கிறார். கிராமிய பின்னணியிலான சமையல் கலை நிபுணரின் வாழ்வியலை விவரிக்கும் இந்த திரைப்படத்தை சத்யஜோதி பிலிம்ஸ் நிறுவனம் சார்பில் தயாரிப்பாளர்கள் செந்தில் தியாகராஜன் -அர்ஜுன் தியாகராஜன் ஆகியோர் தயாரித்திருக்கிறார்கள். இந்த திரைப்படத்தை தயாரிப்பாளர் டிஜி தியாகராஜன் வழங்குகிறார்.
இப்படத்தின் அறிமுக காணொளி வெளியாகி பெரும் வரவேற்பை பெற்ற நிலையில்… தற்போது இந்த திரைப்படம் எதிர்வரும் ஜூலை மாதம் 25 ஆம் திகதியன்று வெளியாகும் என படக் குழுவினர் பிரத்யேக காணொளியை வெளியிட்டு உற்சாகத்துடன் அறிவித்துள்ளனர். படத்தில் இடம்பெறும் கதாபாத்திரங்களின் பெயர்களும், அந்த கதாபாத்திரத்தில் நடிக்கும் நடிகர்களும் தோன்றும் காணொளி.. ரசிகர்களை வெகுவாக கவர்ந்திருக்கிறது
அதிலும் ஆகாச வீரன்- பேரரசி – சித்திரை – அரசாங்கம் – செம்பையா – பொற்செல்வன் – அமரசிகாமணி – நயினாவதி, பொட்டு, மகிழினி, பாரிவேந்தன், நாகப்பாம்பு, ராகவர்த்தினி, சங்கத்தலைவன், சோமன், மடப்புலி, தம்பி கண்ணா , ஒத்தாசை, ஆவர்ணம் என மண்ணின் மைந்தர்களாக கதாபாத்திரங்களையும், நடிகர்களையும் அறிமுகப்படுத்தி இருப்பது ரசிகர்களிடத்தில் படத்தைப் பற்றிய எதிர்பார்ப்பை உண்டாக்கி இருக்கிறது.
