‘ பிக் பொஸ்’ மூலம் சின்னத்திரை ரசிகர்களிடம் அறிமுகமாகி, ‘கூகுள் குட்டப்பா’ படத்தின் மூலம் சினிமா ரசிகர்களிடத்தில் பிரபலமானவர் நடிகர் தர்ஷன் தியாகராஜா. இவர் கதையின் நாயகனாக நடித்திருக்கும் ‘சரண்டர்’ படத்தின் முன்னோட்டம் வெளியிடப்பட்டிருக்கிறது.
அறிமுக இயக்குநர் கௌதமன் கணபதி இயக்கத்தில் உருவாகி உள்ள ‘சரண்டர் ‘ எனும் திரைப்படத்தில் தர்ஷன், லால், சுஜித் சங்கர், பாடினி குமார் , மன்சூர் அலிகான், முனிஸ்காந்த் உள்ளிட்ட பலர் நடித்திருக்கிறார்கள்.
மெய்யேந்திரன் ஒளிப்பதிவு செய்திருக்கும் இந்த திரைப்படத்திற்கு விகாஸ் பதீசா இசையமைத்திருக்கிறார். காவல்துறையின் பின்னணியில் நடைபெறும் திரில்லராக தயாராகி இருக்கும் இந்த திரைப்படத்தை அப்பீட் பிக்சர்ஸ் நிறுவனம் சார்பில் தயாரிப்பாளர் வி. ஆர். வி. குமார் தயாரித்திருக்கிறார்.
எதிர்வரும் ஓகஸ்ட் மாதம் முதல் திகதியன்று உலகம் முழுவதும் படமாளிகையில் வெளியாகும் என அறிவிக்கப்பட்டிருக்கும் இந்த திரைப்படத்தின் முன்னோட்டம் வெளியிடப்பட்டிருக்கிறது. இதற்காக சென்னையில் நடைபெற்ற பிரத்யேக நிகழ்வில் படக் குழுவினருடன் இயக்குநர் எஸ் அறிவழகன் மற்றும் படத்தொகுப்பாளர் சபு ஜோசப் ஆகியோர் சிறப்பு அதிதிகளாக பங்கு பற்றினர்.
படத்தைப் பற்றி இயக்குநர் கௌதம் கணபதி பேசுகையில், ” இந்த படைப்பை எந்தவித சமரசமும் இல்லாமல் நேர்மையாக உருவாக்கி இருக்கிறோம். இதற்கு முழு ஆதரவளித்த தயாரிப்பாளருக்கு முதலில் என் நன்றியை தெரிவித்துக் கொள்கிறேன். படத்தில் பாடல்கள் கிடையாது. எக்சன் திரில்லராக தயாராகி இருக்கும் இந்த திரைப்படத்தின் திரைக்கதையில் ஒரு பரீட்சார்த்தமான முயற்சியை செய்திருக்கிறோம். இது ரசிகர்களை கவரும் என நம்புகிறேன் ” என்றார்.
