2025 ஜனவரி முதல் செப்டம்பர் வரையிலான காலகட்டத்தில் இலங்கையின் ஏற்றுமதித் துறை தொடர்ந்து நிலைத்தன்மையையும் முறையான வளர்ச்சியை காட்டியுள்ளதாக ஏற்றுமதி மேம்பாட்டு சபையின் (EDB) தலைவர் மங்கள விஜேசிங்க தெரிவித்துள்ளார்.
அதாவது ஏற்றுமதியின் மொத்த வருவாய் 12,986.52 மில்லியன் அமெரிக்க டொலர்கள் என பதிவாகியுள்ளதாகவும் அவர் குறிப்பிட்டுள்ளார்.
இது 2024 ஆம் ஆண்டின் இதே காலகட்டத்துடன் ஒப்பிடும்போது 7% அதிகமாகும்.
செப்டம்பர் 2025 இல் மட்டும், மொத்த ஏற்றுமதிகள், வணிக ஏற்றுமதி மற்றும் சேவை ஏற்றுமதி இரண்டும் உட்பட, 1,469.75 மில்லியன் அமெரிக்க டொலர்களை எட்டியுள்ளது.
இது செப்டம்பர் 2024 உடன் ஒப்பிடும்போது 12.33% வளர்ச்சியாகுமெனவும் அவர் தெரிவித்துள்ளார்.
இது இலங்கையின் ஏற்றுமதித் துறையின் வலிமையையும், சந்தை அணுகலை விரிவுபடுத்துவதற்கும் உலகளாவிய போட்டித்தன்மையை மேம்படுத்துவதற்கும் செயல்படுத்தப்படும் உத்திகளின் செயல்திறனையும் நிரூபிக்கிறது எனவும் தலைவர் மங்கள விஜேசிங்க, தெரிவித்துள்ளார்.
