-த.சுபேசன்-
தமிழ் மக்களுடைய வரலாறு, பாரம்பரியம் மற்றும் பண்பாடு ஆகியவற்றை சிதைக்காத வகையில் வடக்கு – கிழக்கு மாகாணங்களில் சுற்றுலாத்துறை வளர்ச்சி காணப்பட வேண்டும். இதனை தமிழ் அரசியல்வாதிகள் மற்றும் உள்ளூராட்சி சபைகள் உறுதிப்படுத்த வேண்டும் என இலங்கை கல்வி அபிவிருத்திக் குழுமத்தின் காப்பாளர் ந.சச்சிதானந்தன் வேண்டுகோள் விடுத்துள்ளார்.
தமிழர்களுடைய கலாசாரம் பல விதத்திலும் மருவி வருகின்றது. மக்களுடைய உடைகளில் மாற்றங்கள் ஏற்பட்டு விட்டன. அதே நேரம் உணவு, வழிபாட்டு முறைமை, திருமண வைபவம் எனப் பல விடயங்களிலும் தமிழர்களுடைய கலாசாரம் மாறி வருகின்றது.
எமது மாகாண சுற்றுலாத் துறையின் வளர்ச்சியால் நாம் ஒருபுறம் மகிழ்ச்சி அடைந்தாலும் மறுபக்கம் அதன் வளர்ச்சி எமது கலாசாரத்தில் பாரிய மாற்றங்களை ஏற்படுத்துகின்றது என்பது வருத்தமளிக்கின்றது. புலம்பெயர்ந்த மக்கள் மற்றும் சுற்றுலாப் பயணிகள் வடபகுதிக்கு வரும்போது அந்தக் கலாசாரத்தை வடபகுதி மக்கள் பின்பற்றத் துணிகின்றனர்.
அத்துடன் எமது பாரம்பரிய உணவுகளைப் புறந்தள்ளி, விரைவு உணவுகளுக்கு மக்கள் அடிமையாகி விட்டார்கள்.
இன்றைய இளம் தமிழ்த் தலைமுறைகளின் பெயர்களில் ஒரு தமிழ்ப் பெயரை கூட நாம் கண்டு கொள்ள முடியாமல் இருக்கின்றது. முன்பு அழகான தமிழ்ப் பெயர்களைச் சூட்டினார்கள், ஆனால் இன்று தமது பிள்ளைகள், பேரப் பிள்ளைகள், பூட்டப் பிள்ளைகளுக்குத் தமிழரென்று அடையாளம் காண முடியாத அளவிற்குப் பெயர்களைச் சூட்டி வருகின்றனர். பாடசாலை வரவு இடாப்பில் கூட ஒரு தமிழ்ப் பெயரைக் காண்பது அரிதாகவே உள்ளது.
வடக்கு மாகாணத்தில் ஏற்பட்டுள்ள கலாசார சீர்கேட்டின் விளைவாக இன்று ஆலயங்களுக்கு சேலை கட்டிச் செல்லும் பெண்களும், வேட்டி கட்டிச் செல்லும் ஆண்களும் அருகி விட்டனர். திருமணங்கள், மரணச் சடங்குகளில் கூடப் பாரிய மாற்றங்கள் எமது தமிழர் பிரதேசத்தில் ஏற்பட்டுவிட்டன.
எனவே, தமிழ் அரசியல்வாதிகள் தமிழ்த் தேசியத்தை ஒருபுறம் பார்க்கும் அதேவேளையில் தமிழ் மக்களுடைய கலாசாரம் அழிந்துபோகாமல் பார்க்க வேண்டும்.
இன்று பல இளைஞர், யுவதிகள் கலாச்சார சீர்கேட்டுக்கு முகம் கொடுத்து வருகின்றனர். இது எமது சமூகத்துக்கு ஆரோக்கியமானது அல்ல என மேலும் அவர் தெரிவித்தார்.
