ஆட்டோ, கிரிக்கெட் பேட், விசில், வெற்றிக் கிண்ணம் உள்ளிட்ட சின்னங்களில் ஒரு சின்னத்தை ஒதுக்குமாறு தேர்தல் ஆணையத்தில் த.வெ.க நிர்வாகிகள் மனு கையளித்துள்ளனர்.
தமிழக சட்டப்பேரவை தேர்தலுக்கு இன்னும் 6 மாதங்களே இருப்பதால், தமிழக வெற்றிக் கழக தலைவர் விஜய் பல்வேறு வியூகங்களை வகுத்து வருகிறார். இருப்பினும் கரூர் சம்பவத்திற்கு பின் சுற்றுப் பயணங்களை அவர் தவிர்த்து வருகின்றார்.
இதற்கிடையில், மீண்டும் விஜய் சுற்றுப்பயணம் மேற்கொண்டு மக்களை சந்திப்பதற்கான ஏற்பாடுகள் நடைபெற்று வருகிறது. அதற்காக, கட்சியில் பல்வேறு மாற்றங்களை விஜய் செய்து வருகிறார்.
இந்நிலையில், அடுத்த ஆண்டு நடைபெறவுள்ள தமிழக சட்டப்பேரவை தேர்தலில் போட்டியிடவுள்ள தவெக கட்சிக்கு சின்னம் ஒதுக்கக்கோரி, அக்கட்சியின் நிர்வாகிகள் டெல்லியில் உள்ள தேர்தல் ஆணையத்தில் மனு கொடுத்தனர். த.வெ.க கொடுத்துள்ள பொதுவான 10 சின்னங்கள் அடங்கிய பட்டியலில் ஆட்டோ, கிரிக்கெட் பேட், விசில் சின்னம் இடம்பெற்றுள்ளது.
இதுதொடர்பாக தவெக நிர்வாகிகளிடம் கேட்ட போது, ‘வேட்டைக்காரன் படத்தில் விஜய் ஆட்டோ ஓட்டுவார். பைரவா படத்தில் விஜய் கிரிக்கெட் விளையாடுவார். பிகில் படத்தில் விஜய் கபடி பயிற்சியாளராக விசிலுடன் இருப்பார். அதேபோல் பிகில் படத்தில் ‘கப் முக்கியம்’ என்று விஜய் சொல்வார். அதனால், வெற்றிக் கிண்ண சின்னமும் கேட்டுள்ளோம். இந்த நான்கு சின்னமும் விஜய்க்கு மிகவும் பிடித்த சின்னமாக உள்ளது. இதில், ஏதாவது ஒரு சின்னம் தேர்தல் ஆணையம் ஒதுக்கினால், சின்னத்தை எளிதாக மக்களிடம் கொண்டு சேர்க்க முடியும் என்றனர்.
