மாரடைப்பைத் தடுக்கும் மீன்கள்!

தற்போது மாரடைப்பால் ஏற்படும் மரணங்கள் அதிகரித்து வருகின்றது. மாரடைப்பு ஏற்படுவதற்கு பல்வேறு காரணங்கள் இருந்தாலும், கொலஸ்ட்ரோல் மிக முக்கிய காரணியாகவுள்ளது. மீன்கள் ஆரோக்கியமான உணவாக கருதப்பட்டாலும், அனைத்து மீன்களும் கொலஸ்ட்ரோல் அளவை கட்டுப்படுத்தாது. சில வகையான மீன்கள் அதை கட்டுப்படுத்துகின்றது. அந்த வகையில் கொலஸ்ட்ரோல் அளவை குறைத்து, மாரடைப்பைத் தடுக்க உதவும் 5 வகை மீன்கள் குறித்து பார்பபோம்.

சூரை மீன்

சூரை மீன்களில் ஒமேகா-3 கொழுப்பு அமிலங்கள் அதிகமாக உள்ளன. இந்த வகை கொழுப்பு அமிலங்கள், இரத்தக்குழாய்களில் தேங்கியுள்ள கெட்ட கொலஸ்ட்ரோலின் தேக்கத்தைக் குறைக்க உதவிசெய்து, மாரடைப்பு ஏற்படும் அபாயத்தைக் குறைக்கின்றது.

கானாங்கெளுத்தி மீன்

சுவை மிகுந்த கானாங்கெளுத்தி மீனில் ஒமேகா 3 கொழுப்பு அமிலங்கள் அதிகமாக உள்ளன. இந்த கொழுப்பு அமிலங்கள் கொலஸ்ட்ரோல் அளவை குறைக்க பெரிதும் உதவுகின்றன. உலக அளவில் முக்கியமான மீனாக கருதப்படும் கானாங்கெளுத்தி மீன் மாரடைப்புக்கு எதிரியாக விளங்குகின்றது.

இறையன் மீன்

இறையன் மீன் எனப்படும் டிரவுட் மீனில் ஒமேகா-3 கொழுப்பு அமிலங்கள் நிறைந்துள்ளதால், உடலில் கெட்ட கொலஸ்ட்ரோல் அளவை பெருமளவு குறைக்கின்றது. எனவே இந்த மீனை அடிக்கடி வாங்கி சாப்பிடுவது இதய ஆரோக்கியத்தை மேம்படுத்தும்.

வெங்கணா மீன்

வெங்கணா எனப்படும் ஹெர்ரிங் மீனில் ஈ.பி.ஏ. மற்றும் டி.எச்.ஏ. என்னும் 2 வகையான அத்தியாவசிய கொழுப்பு அமிலங்கள் மற்ற மீன்களை விட அதிகமாக உள்ளன. இவை உடலினுள் ஏற்படும் வீக்கத்தை குறைக்க உதவுவதோடு, இதய ஆரோக்கியத்தை மேம்படுத்தவும் உதவுகின்றன. முக்கியமாக இந்த மீனில் விட்டமின் டி அதிகளவில் உள்ளது.

மத்தி மீன்

ஏராளமான சத்துகளை உள்ளடக்கிய மத்தி மீனில் ஒமேகா-3 கொழுப்பு அமிலங்கள் மட்டுமன்றி, கல்சியம், பொட்டாசியம் போன்றவையும், இரும்புச் சத்து, செலினியம் போன்ற தாதுக்களும் அதிகமாக நிறைந்துள்ளன. எனவே மத்தி மீனை அடிக்கடி வாங்கிச் சாப்பிட்டால் இதய ஆரோக்கியம் மேம்படுவதோடு, இரத்த சர்க்கரை அளவும் குறையும். ஒட்டுமொத்த உடலும் ஆரோக்கியமாக இருக்கும்.

மேற்கூறிய 5 மீன் வகைகளும் குறைந்த கொலஸ்ட்ரோல் அளவை கொண்டுள்ளதால், இவற்றை அடிக்கடி சாப்பிடுவது மாரடைப்புடன், பக்கவாதத்தையும் தடுக்கும்.