-ஆசிரியர்கள், மாணவர்களை பணயக்கைதிகளாக்கியதால் பெரும் பரபரப்பு-
தாய்லாந்தின் சோங்க்லா மாகாணத்தில் ஹாட் யாய் மாவட்டத்தில் இயங்கி வந்த பாடசாலையில் 18 வயது இளைஞன் துப்பாக்கிச்சூடு நடத்திய சம்பவம் பரபரப்பை ஏற்படுத்தி உள்ளது.
நேற்று முன்தினம் மாலை, துப்பாக்கியுடன் பள்ளிக்குள் புகுந்த அந்த இளைஞன் துப்பாக்கியால் சுட்டத்தில் பாடசாலை தாளாளர் காயமடைந்தார். மேலும் 2 சிறுவர்கள் காயம் அடைந்தனர். தொடர்ந்து அந்த இளைஞன் பள்ளிக்குள் ஆசிரியர்களையும் மாணவர்களையும் பிணைக் கைதிகளாகப் பிடித்து வைத்திருந்தான்.
தகவலறிந்து விரைந்த பொலிஸார் மற்றும் பாதுகாப்பு படையினர் பாடசாலையை முற்றுகையிட்டு மாணவர்களை மீட்கும் முயற்சியில் ஈடுபட்டனர். இதற்கிடையே பெற்றோர்கள் பாடசாலை முன் குவிந்ததால் அங்கு பரபரப்பான சூழல் நிலவியது.
இறுதியில் அந்த இளைஞன் ஆயுதத்தை கீழே போட்டு பொலிஸாரிடம் சரணடைந்தான். அவனை கைது செய்த பொலிஸார் ஆசிரியர்களையும் மாணவர்களையும் பாதுகாப்பாக மீட்டனர். காயமடைந்தவர்கள் மருத்துவமனையில் சிகிச்சை பெற்று வருகின்றனர்.
தாக்குதல் நடத்த பாடசாலைக்குள் நுழைவதற்கு முன் அந்த இளைஞன் பொலிஸ் அதிகாரி ஒருவரிடம் இருந்து துப்பாக்கியை பரிந்து வந்தது தெரியவந்துள்ளது. மேலும் அந்த இளைஞன் தனது தங்கையை கண்டித்த ஆசிரியரை தேடி அங்கு வந்ததாகவும் முதற்கட்ட தகவல் வெளியாகி உள்ளது.
