தியாகி திலீபனின் நினைவேந்தல் மற்றும் அவரது சிலை அமைப்பது தொடர்பான விடயங்களை அரசியலாக்காமல், அனைத்து தரப்பினரும் ஒன்றுபட்டு பொறுப்புடன் செயற்பட்டிருக்க வேண்டும் என தேசிய மக்கள் சக்தியின் யாழ்ப்பாண மாநகர சபை உறுப்பினர் சுந்தரமூர்த்தி கபிலன் தெரிவித்துள்ளார்.
யாழ்ப்பாண மாநகர சபையின் இன்றைய அமர்வில் இடம்பெற்ற விவாதத்தின் போது உரையாற்றிய அவர், அமரர் திலீபனின் நினைவு அனுஷ்டிப்பு தொடர்பில் ஏனைய அரசியல் கட்சிகள் ஒன்றையொன்று சாடிக்கொண்டு நீண்ட விவாதத்தை நடத்திக்கொண்டிருக்கும் நிலையில், இந்த விடயம் தொடர்பில் விவாதிப்பதில் தாம் மனவருத்தமடைவதாகத் தெரிவித்தார்.
ஒரு கட்சியைச் சேர்ந்த உறுப்பினர்கள் தமது கட்சியையும் அரசாங்கத்தையும் விமர்சித்து கேள்விகளைத் தொடுத்ததன் காரணமாகவே தாம் பதிலளிக்க வேண்டிய நிலை ஏற்பட்டுள்ளதாகக் குறிப்பிட்ட அவர், பொறுப்புடன் செயற்பட வேண்டும் என்ற நோக்கிலேயே தாம் இந்த விடயம் தொடர்பில் கருத்துத் தெரிவிப்பதாகக் கூறினார்.
திலீபனின் நினைவேந்தல் தொடர்பான விடயங்களில் தமது கட்சி எந்தவித எதிர்ப்பு நிலைப்பாட்டையும் எடுத்திருக்கவில்லை எனவும், மாறாக தியாகத்தின் மீதான மரியாதையின் அடிப்படையில் தமது கட்சியைச் சேர்ந்த உறுப்பினர்கள் மலரஞ்சலி செலுத்தியதாகவும் அவர் தெரிவித்தார்.
திலீபனின் படம் மாநகர சபை வளாகத்தில் நிகழ்ச்சி நிரலில் இடம்பெறாத நிலையில் வைக்கப்பட்ட சந்தர்ப்பத்திலும், தமது கட்சியைச் சேர்ந்த 10 உறுப்பினர்கள் அங்கு சென்று மலரஞ்சலி செலுத்தியதாகக் குறிப்பிட்ட கபிலன், பின்னர் திலீபனின் சிலையை அமைப்பது தொடர்பான பிரேரணை சபைக்கு கொண்டுவரப்பட்டபோதும் தமது தரப்பு அதற்கு எதிர்ப்பு தெரிவிக்கவில்லை எனவும் தெரிவித்தார்.
எனினும், மாநகர சபையின் நடைமுறைகள் மற்றும் சட்ட விதிமுறைகளுக்கு அமைவாகவே எந்தவொரு பிரேரணையும் முன்வைக்கப்பட வேண்டும் என அவர் வலியுறுத்தினார்.
குறிப்பாக, இவ்வாறான உணர்வுபூர்வமான விடயம் தொடர்பான பிரேரணை விசேட கவனத்துடனும் உரிய நடைமுறைகளைப் பின்பற்றியும் முன்வைக்கப்பட்டிருக்க வேண்டும் எனவும் தெரிவித்தார்.
ஒரு சிலையை நிரந்தரமாக அமைப்பதற்கான தீர்மானத்தை முன்வைக்க வேண்டுமெனில், உரிய கால அவகாசத்துடன் பிரேரணையைச் சமர்ப்பித்து, அது நிகழ்ச்சி நிரலில் இடம்பெற்று, தேவையான சட்ட ஆலோசனைகளைப் பெற்ற பின்னரே சபையில் கலந்துரையாடப்பட்டிருக்க வேண்டும் எனவும் அவர் குறிப்பிட்டார்.
சிலை அமைப்பதற்கான நடவடிக்கைகள் உரிய முறையில் முன்கூட்டியே திட்டமிடப்பட்டிருந்தால், அது தொடர்பில் அனைத்து உறுப்பினர்களுடனும் கலந்துரையாடி, சட்டரீதியான விடயங்கள் தொடர்பில் மாநகர சபையின் சட்ட ஆலோசகர்களிடம் ஆலோசனை பெற்று, ஒருமித்த முடிவை எடுத்திருக்க முடியும் எனவும் அவர் தெரிவித்தார்.
மேலும், சிலை அமைப்பது தொடர்பான நடவடிக்கையின் ஆரம்ப கட்டத்தில் அது தற்காலிகமாக அமைக்கப்படுவது என்றே கலந்துரையாடப்பட்டதாகவும், அதுவே தீர்மானமாகவும் எடுக்கப்பட்டிருந்ததாகவும் கபிலன் குறிப்பிட்டார். இதற்காக சில அரசியல் கட்சிகளுக்கிடையே பேச்சுவார்த்தைகளும் இடம்பெற்றிருந்ததாகவும் அவர் தெரிவித்தார்.
தமது கட்சியுடன் இது தொடர்பில் கலந்துரையாடப்படாத போதிலும், இந்த விடயத்தில் தாம் மரியாதையுடன் அமைதியாக இருந்ததாகக் குறிப்பிட்ட அவர், அதன் பின்னர் இடம்பெற்ற சம்பவங்கள் தொடர்ச்சியாக தமது அரசாங்கத்தின் மீது பழிசுமத்தும் வகையில் அமைந்தமை தமக்கு அதிருப்தியை ஏற்படுத்தியதாகவும் தெரிவித்தார்.
“நாங்களும் உணர்வுள்ள மனிதர்கள்தான். தியாகத்திற்கு மரியாதை செலுத்தும் நோக்கிலேயே நாங்கள் ஆதரவளித்தோம். எங்களிடம் எந்தவித எதிர்ப்பும் இருக்கவில்லை. அவ்வாறிருக்கையில், இன்று எங்களுடன் மோதிக்கொள்ளும் நிலை ஏற்பட்டுள்ளது” என அவர் தெரிவித்தார்.
அதேவேளை, திலீபனின் நினைவு மற்றும் சிலை தொடர்பான விடயத்தில் காவல்துறையின் நடவடிக்கைகளை அரசியல் ரீதியாக விமர்சிப்பதைத் தவிர்த்து, ஏதேனும் சட்டவிரோதம் அல்லது அநீதி இடம்பெற்றதாகக் கருதப்பட்டால், உரிய சட்ட நடைமுறைகளை நாடுவதே பொருத்தமானது எனவும் அவர் குறிப்பிட்டார்.
அரசாங்க அதிகாரிகள் தங்களுக்கு வழங்கப்பட்டுள்ள சட்டரீதியான கடமைகளின் அடிப்படையில் செயற்படுவது போன்று, காவல்துறையும் தனது சட்டரீதியான கடமையைச் செய்திருக்கலாம் எனக் குறிப்பிட்ட அவர், சட்டத்தின் மீது நம்பிக்கை இருந்தால் சட்டரீதியான வழிமுறைகளையே பயன்படுத்த வேண்டும் என வலியுறுத்தினார்.
மேலும், திலீபனின் நினைவேந்தல் தொடர்பான விடயங்களில் ஒவ்வொரு ஆண்டும் பல்வேறு அரசியல் தரப்புகளுக்கு இடையே ஏற்படும் போட்டி மற்றும் கருத்து முரண்பாடுகள் குறித்து உறுப்பினர் கபிலன் கவலை தெரிவித்தார்.
தியாகத்தின் நினைவைப் போற்றும் விடயம் கட்சிகளுக்கு இடையிலான அரசியல் போட்டியாக மாறக்கூடாது எனக் குறிப்பிட்ட அவர், நினைவேந்தல் போன்ற உணர்வுபூர்வமான விடயங்களை ஊடகப் பிரசாரம் அல்லது அரசியல் விளம்பரத்திற்காக பயன்படுத்த வேண்டாம் எனவும் கேட்டுக்கொண்டார்.
“தியாகத்தின் நினைவை ஒவ்வொரு முறையும் அரசியல் விவாதத்திற்குள் கொண்டு வந்து சிக்கலாக்குவது வேதனையளிக்கிறது. இந்த விடயம் தொடர்பில் அனைவரும் ஒன்றுபட்டு செயற்பட வேண்டும். கருத்து வேறுபாடுகள் இருந்தால் அவற்றை உரிய நடைமுறைகளின் ஊடாகத் தீர்த்துக்கொள்ள வேண்டும்” என அவர் தெரிவித்தார்.
மேலும், ஊடகங்கள் இந்த விவகாரத்தை செய்தியாக வெளியிடும்போது, சம்பவத்தின் முழுமையான பின்னணியையும் அனைத்து தரப்பினரின் நிலைப்பாடுகளையும் கருத்தில் கொண்டு செய்திகளை வெளியிட வேண்டும் எனவும் அவர் கேட்டுக்கொண்டார்.
அதன்படி, அவர் பின்வரும் கேள்விகளையும் முன்வைத்தார்:
- வருடாந்த நினைவு நிகழ்விற்காக சிலையை வடிவமைத்தவர்கள், அதற்கான அனுமதியைப் பெறுவதற்காக 3 அல்லது 7 நாட்களுக்கு முன்னதாகவே பிரேரணையை மாநகர சபைக்கு ஏன் சமர்ப்பிக்கவில்லை?
- 15.09.2026 அன்று காலையிலேயே சிலையை வைத்த பின்னர், ஏன் மதியம் மாநகர சபையின் அனுமதிக்காக விண்ணப்பித்தீர்கள்?
- தற்காலிக அனுமதிக்கே விண்ணப்பித்து, அதனடிப்படையில் அனுமதியும் கிடைத்திருந்த நிலையில், நிகழ்வு முடிந்த பின்னர் 26.09.2026 மாலையில் ஏன் சிலையை அகற்றவில்லை?
“இவற்றுக்குப் பதிலளித்தால், உண்மையில் ஒரு தியாகத்தை மதிக்கும் உணர்வுள்ள ஒருவரால் இவ்வாறு செய்திருக்க முடியுமா என்ற கேள்வி எழுகிறது. இது தவறான திட்டத்தைத் தீட்டி, அதன் மூலம் ஒரு பிரச்சினையை உருவாக்க வேண்டும் என்ற உள்நோக்கத்துடன் செயற்பட்டவர்களாலேயே செய்ய முடியும்” என அவர் தெரிவித்தார்.
“ஆனால் நாங்கள் மாநகர சபையில் இடம்பெற்ற நினைவேந்தல் நிகழ்வில் பங்குகொண்டோம். திடீரெனக் கொண்டுவரப்பட்ட பிரேரணையையும் எதிர்க்காமல் இருந்தோம். இந்நிலையில், எங்களை துரோகிகள் என முத்திரை குத்த முயல்வது மிகவும் அசிங்கமான அரசியலின் அடையாளமாகும்” எனவும் கபிலன் குறிப்பிட்டார்.
“இந்த நிலையில் சிலை அகற்றப்பட்டதும் அனைவரும் எம்மை எதிர்ப்பதில் ஒற்றுமை காட்டினீர்களே. இதே ஒற்றுமையை சிலை அமைப்பதற்கான அனுமதியைப் பெறுவதிலும் காட்டியிருக்கலாமே?” எனவும் அவர் கேள்வி எழுப்பினார்.
“தியாகத்தை வருடாவருடம் கொச்சைப்படுத்தி, அதனை ஒரு சத்திர சிகிச்சைக்கு உட்படுத்தி சிதைக்கும் அரசியலை நினைத்து நாம் வெட்கப்படுகிறோம். இந்தத் தியாகம் தொடர்பான ஒரு மோதலில் நானும் பதிலளிக்க வேண்டிய நிலை ஏற்பட்டதை நினைத்து மனம் வருந்துகிறேன்” எனவும் அவர் தெரிவித்தார்.
திலீபனின் தியாகத்தை அரசியல் நோக்கங்களுக்காகப் பயன்படுத்தாமல், அவரது நினைவை மதிக்கும் வகையில் அனைத்து தரப்பினரும் பொறுப்புடனும் ஒற்றுமையுடனும் செயற்பட வேண்டும் என்பதே தமது நிலைப்பாடு எனவும் யாழ்ப்பாண மாநகர சபையில் சுந்தரமூர்த்தி கபிலன் மேலும் தெரிவித்தார்.
