திரிபுபடுத்தப்படாத உண்மையான தமிழர் வரலாறு புதிய பாடத்திட்டத்தில் உள்வாங்கப்பட வேண்டும் என்று தமிழரசுக்கட்சியின் மட்டக்களப்பு மாவட்ட எம்.பி இரா.சாணக்கியன் வலியுறுத்தியுள்ளார்.
பாராளுமன்றத்தில் நேற்று வரவு – செலவுத்திட்ட குழு விவாதத்தில் உரையாற்றுகையிலேயே இவ்வாறு தெரிவித்த அவர் மேலும் பேசுகையில்:-
வரலாறு பாடத்தை விருப்பத்திற்குரிய பாடமாக மாற்றுவது தொடர்பில் கருத்துக்கள் முன்வைக்கப்பட்டிருந்தன. ஆனால் வரலாறு பாடத்திற்கு முக்கியத்துவம் கொடுத்து நாட்டு மக்களுக்கும் எதிர்கால சந்ததியினருக்கும் சரியான வரலாற்றை கற்பிக்க வேண்டும் என்று கோருகின்றேன்.
மிக முக்கியமாக இந்த நாட்டில் 200, 1000 ஆண்டுகளுக்கு முன்னர் எவ்வாறு தமிழ் மன்னர்கள் ஆட்சி செய்தார்கள், பிரித்தானியர்கள் இந்த நாட்டுக்கு புதிய அரசியலமைப்பை தந்த போது அதனை தமிழ் மக்கள் ஏற்றுக்கொள்ளவில்லை என்ற வரலாறு, அதேபோன்று 1926 ஆம் ஆண்டில் சமஸ்டி அடிப்படையிலான தீர்வே இந்த நாட்டில் பிரச்சினைகளை தீர்ப்பதற்கான வழியென பண்டாரநாயக்க கூறிய வரலாறு, டொனமூர் முதல் அரசியலமைப்பு தொடர்பான சகல சந்தர்ப்பங்களிலும் அதனை தமிழ் மக்கள் எவ்வாறு எதிர்த்தார்கள் என்பது பற்றியும், 1948 முதல் தமிழ் மக்களுக்கு எதிரான அநீதிகள் தொடர்பிலும் இந்த வரலாறு பாடத்தில் உள்வாங்கி அதனை பாடத்தின் ஊடாக கூறினால் மாத்திரமே எதிர்வரும் தலைமுறையிலாவது சகல இன மக்களும் சமமான மக்களாக கருதப்படுவார்கள்.
அவ்வாறு இல்லையென்றால் இப்போது தொல்பொருள் திணைக்களத்தால் மக்கள் படும் அவஸ்தைகள் போன்றவை இன்னும் 100 ஆண்டுகள் சென்றாலும் நடக்கும் என்றார்.
