காங்கேசன்துறை துறைமுக அபிவிருத்தி புரிந்துணர்வு ஒப்பந்தம் தொடர்பில் 2026 ஆம் ஆண்டு ஜனவரி இந்தியாவுடன் பேச்சுவார்த்தைகளை ஆரம்பிக்கவுள்ளோம். இலங்கை – இந்தியா கூட்டுத்தன்மையுடன் இந்த அபிவிருத்திப் பணிகளை முன்னெடுப்பதற்கு இந்தியா இணக்கம் தெரிவித்து, 63.15 மில்லியன் டொலரை நிவாரணமாக வழங்க முடிவு செய்துள்ளதாக துறைமுகம் மற்றும் சிவில் விமான சேவைகள் அமைச்சர் அநுர கருணாதிலக தெரிவித்தார்.
பாராளுமன்றத்தில் நேற்று திங்கட்கிழமை இடம்பெற்ற வரவு செலவுத் திட்ட குழுநிலை விவாதத்தில் உரையாற்றும் போது இவ்வாறு தெரிவித்த அவர் மேலும் கூறுகையில்:-
யாழ்ப்பாணம் – காங்கேசன்துறை துறைமுகத்தை அபிவிருத்தி செய்வது குறித்து விசேட கவனம் செலுத்தப்பட்டுள்ளது. சர்வதேச மற்றும் தேசிய மட்டத்திலான பயணிகள் கப்பல் போக்குவரத்து சேவையை ஆரம்பிப்பதற்கு கடந்த காலங்களில் பல பேச்சுவார்த்தைகள் இடம்பெற்றன. இருப்பினும் ஒருசில காரணிகளால் அந்த பேச்சுவார்த்தைகள் வெற்றிபெறவில்லை.
காங்கேசன்துறை துறைமுக அபிவிருத்தி புரிந்துணர்வு ஒப்பந்தம் தொடர்பில் மாற்று யோசனைகளை நாங்கள் இந்தியாவிடம் முன்வைத்துள்ளோம். இது தொடர்பில் 2026 ஆம் ஆண்டு ஜனவரி இந்தியாவுடன் பேச்சுவார்த்தைகளை ஆரம்பிக்கவுள்ளோம். இலங்கை – இந்தியா கூட்டுத்தன்மையுடன் இந்த அபிவிருத்தி பணிகளை முன்னெடுப்பது குறித்து இந்தியா இணக்கம் தெரிவித்துள்ளது.
காங்கேசன்துறை துறைமுகத்தை அபிவிருத்தி செய்ய இந்தியா ஆரம்பத்தில் கடன் வழங்கவே இணக்கம் தெரிவித்திருந்தது. ஆனால் தற்போது 63.15 மில்லியன் டொலரை நிவாரணமாக வழங்க இணக்கம் தெரிவித்துள்ளது. இந்த அபிவிருத்திப் பணிகள் எதிர்வரும் ஆண்டு முன்னெடுக்கப்படும் என்றார்.
