இந்தியா – பாகிஸ்தானில் அண்மைய நாட்களில் குண்டுவெடிப்பு சம்பவங்கள் இடம்பெற்றுள்ள நிலையில் அதனால் இலங்கைக்கு எந்தவொரு பாதிப்பும் இல்லை என பொதுமக்கள் பாதுகாப்பு அமைச்சர் ஆனந்த விஜேபால தெரிவித்துள்ளார்.
இது குறித்து அவர் மேலும் குறிப்பிடுகையில், புலனாய்வு அமைப்புகளின் தீவிர இருப்பு மற்றும் விழிப்புணர்வு காரணமாக நாட்டின் பாதுகாப்பு நிலைமை நிலையானதாக உள்ளது. நமது பாதுகாப்புப் படைகள், குறிப்பாக முப்படைகள் மற்றும் காவல்துறை, தேசிய பாதுகாப்பில் குறிப்பாக கவனம் செலுத்துகின்றன. எனவே, தேசிய பாதுகாப்பு குறித்து எந்தப் பிரச்சினையும் இல்லை, இதற்கிடையில், பாதாள உலக நபர்கள் நாட்டிற்குத் திரும்பத் திட்டமிட்டுள்ளதாகக் கூறப்படும் தகவல் தொடர்பில் கருத்து தெரிவித்த அமைச்சர் விஜேபால, தனது முந்தைய கருத்துக்கள் தவறாகப் புரிந்து கொள்ளப்பட்டதாக தெளிவுபடுத்தினார். நான் அப்படிச் சொல்லவில்லை. சில போதைப்பொருள் கடத்தல்காரர்கள் போதைப்பொருள் கடத்தலைக் கைவிட விருப்பம் தெரிவித்துள்ளனர் என்று நான் சொன்னேன். இதுபோன்ற செயல்களில் ஈடுபடுபவர்கள் அந்தப் பாதையை விட்டு வெளியேற விரும்பினால், அது ஒரு நேர்மறையான முன்னேற்றம் என்றார்.
