-உயர்மட்டக் கூட்டத்தில் அமைச்சர் வலியுறுத்தல்-
-இ.கலைஅமுதன்-
யாழ்.வலிகாமம் வடக்கில் தற்போது பாதுகாப்பு தரப்பினரின் பயன்பாட்டில் உள்ள தனியாருக்குச் சொந்தமான காணிகளை விடுவிப்பதில் ஏற்பட்டுள்ள முன்னேற்றத்தை மதிப்பிடுவதற்கான உயர்மட்டக் கூட்டம் நேற்று முன்தினம் நாடாளுமன்ற வளாகத்தில் நடைபெற்றது.
இந்தக் கூட்டத்திற்கு கடற்றொழில் மற்றும் நீரியல் வளத்துறை அமைச்சர் இராமலிங்கம் சந்திரசேகர், பாதுகாப்பு பிரதி அமைச்சர் ஓய்வுபெற்ற மேஜர் ஜெனரல் அருணா ஜெயசேகர மற்றும் துறைமுகங்கள் மற்றும் சிவில் விமானப் போக்குவரத்து பிரதி அமைச்சர் ஜனித ருவான் கொடித்துவக்கு ஆகியோர் தலைமை தாங்கினர். தேசிய நல்லிணக்கச் செயல்முறையின் முக்கிய அங்கமான காணி தொடர்பான பிரச்சினைகளைத் தீர்ப்பதில் அரசாங்கத்தின் முயற்சிகளை விரைவுபடுத்துவதற்காக இந்தக் கலந்துரையாடல் நடத்தப்பட்டது.
எல்லை மறுசீரமைப்புகளை இறுதி செய்தல், இழப்பீட்டு செயல்முறையை விரைவுபடுத்துதல், விடுவிப்பதற்கான காணிகளுக்கு முன்னுரிமை அளித்தல் மற்றும் நிர்வாக இடையூறுகளை சமாளித்தல் ஆகியவை முக்கிய விடயங்களாக விவாதிக்கப்பட்டன.
முக்கியமான பாதுகாப்பு உள்கட்டமைப்பை சமரசம் செய்யாமல், காணி உரிமையாளர்களுக்கு அவர்களின் காணிகளை மீண்டும் வழங்குவதை உறுதி செய்வதன் முக்கியத்துவத்தை அமைச்சர்கள் வலியுறுத்தினர். நாடாளுமன்ற உறுப்பினர்கள், பாதுகாப்பு அமைச்சின் செயலாளர், முப்படைத் தளபதிகள், காவல்துறை மா அதிபர், பாதுகாப்பு மற்றும் நிர்வாகத் துறைகளைச் சேர்ந்த பிற மூத்த அதிகாரிகளும் இந்தக் கூட்டத்தில் பங்கேற்றனர்.
